سورۂ نبا میں اللّٰہ تعالیٰ نے مرنے کے بعد دوبارہ زندگی کا ذکر فرمایا ہے، اپنی قدرت کا تذکرہ فرمایا ہے اس کے نظارے پیش کئیے ہیں، اور کل کے انجام یعنی قیامت کے قائم ہونے کا بیان بھی ہے۔
آج ہم اس مضمون میں سورۂ النبـا اردو ترجمہ تفسیر کو تفصیل سے سمجھیں گے ۔
(verse by verse) سورۂ النبـا تعارف
پہلی 5 آیات قیامت کی عظیم خبر کے بارے میں باہم سوالات کے بارے میں ہیں کہ لوگ اختلافات کر رہے ہیں، بتایا گیا ہے کہ قیامت تو برپا ہو کر رہے گی۔
آیات 6 تا 16 میں اللّٰہ تعالیٰ کی قدرتیں اور نعمتیں بیان کی گئی ہیں، آسمان سے اللّٰہ تعالیٰ بارش برساتا ہے، زمین و آسمان کا خالق اللّٰہ ہے، وہی اللّٰہ ہے جو قیامت کو برپا کرے گا۔
آیات 17 تا 30 میں روزِ قیامت سرکشوں پر عذاب، بلکہ شدتِ عذاب کا بیان ہے، جہنمیوں کو کھولتا ہوا پانی اور پیپ پینا پڑے گا۔
آیات 31 تا 36 متقیوں کا حسین انجام، اللّٰہ تعالیٰ کے نیک اور فرمانبردار بندے، ان کے لئے بے حساب رزق عطا کرنے کا ذکر ہے۔
آیات 37 تا 40 میں میدانِ حشر کا منظر ہوگا، اور کافر یہ چاہے گا کہ وہ مٹی ہوتا اور اس کو دوبارہ کھڑا نہ کیا جاتا۔